Presentación

...os cívicos viñan nunha camioneta, levaban escopetas, gritaban, parecían lataregos...

Así conta Fina uns feitos que lle quedaron gravados cando tiña 8 anos e falanxistas e gardas cívicos baixaban cara Cons de Abaixo buscando a Manolo Amoedo, o fillo de señora Teresa a Barreguda.
Destes anos de medo e represión na comarca pontevedresa, escribiremos nesta bitácora pois o labor de investigación efectuada ao longo dos anos consideramos que debe perfeccionarse mediante a divulgación, dando a coñecer do xeito máis rigoroso posible os feitos, as persoas, as ideas...
Dicían os clásicos que a verdade corrómpese pola mentira pero tamén polo silenzo e, neste momento, logo do Ano da Memoria e a utilización, ás veces, partidista do tema, considero imprescindible seguir traballando para aproximarnos á verdade dos feitos, sen ocultacións de nengún tipo, co emprego da metodoloxía que a ciencia histórica determina.
E remato cunha cita dun personaxe non exento de polémica, como é Günter Grass, sobre a necesidade de divulgar o pasado:

Hai que falar, incluso do máis traumático, sacalo todo. [...] Hai que falar do pasado, porque sempre volve.

(Grass, Gunter. Entrevista. Revista Magazine.17-6-2007.)